فتية النهاردة حط كمادات تلج علشان تنزل الحرارة
الفكرة الفيزيائية اللي أتعملت علشانها الكمادات هي إن أي مادة حرارتها مرتفعة بـــتفقد حرارتها و تنقلها لأي جسم حرارته أقل منها فـــأحنا بنعمل كمادات بالهدف ده
لكن لما نتكلم عن جسم الإنسان دخلنا جانب حيوي في الموضوع فـــفيه حاجة مهمة لازم نعرفها .. إن الجلد لما بيتعرض لبرودة قوية زي التلج الأوعية الدموية القريبة للرأس بــتضيق لو فاكرين كنا استعملنا كمادات ساقعة للي بينزف من مناخيره
إذن فلو عملنا كمادات تلج و حطيناها على رأس عيان حرارته عالية كل اللي هــيحصل إن الأوعية تضيق و مفيش حاجة هاتقل حرارتها غير الجلد اللي في راسه بس و هــتفضل حرارته هو عالية
إيه اللي ممكن نعمله
فيه حاجات كتير طبعاً غير الكمادات بس لو هــنعمل كمادات تبقى مياه باردة من الحنفية
باردة مش ساقعة ( جميعهم و ليس كلهم :) ) أو ممكن نزود عليها كحول هـــتبقى حرارتها أقل و مش هـــتضيق الشرايين فيفضل الدم يتعرض ليها بشكل عادي و الحرارة تنزل
الـفــتّـاي : حـــسام الــديــن ســـالــم
" أكبس الجرح بالبن علشان توقف النزيف " بصراحة بصراحة هي الفتية دي مش غلط أوي يعني :) هو البن له تأثير على الأوعية الدموية و بيساعد على أنقباضها فـــلو كبست الجرح بشوية بن هـــيساعد النزيف اللي نازل من الجرح أنه يقف فعلاً . . بس المشكلة مش في كده .. المشكلة أن البن مش معقم طبعاً و لو حطيته على الجرح تبقى بــتلوث الدم و ده كمان هــيعمل ألتهابات و ممكن يعمل حساسية غير إن البن اللي هــيتحط في الجرح مش هــنعرف نشيله من الجرح بسهولة وهـــيثبت منه كتير على الجرح و ده هـــيمنع التئام الجرح نفسه بعد كده
تتصرف أزاي مع الجرح ؟
عادي بالطريقة الطبية المعروفة طهر الجرح بمحلول مطهر أو كحول مثلاً أو أغسله بــمياه و صابون و بعد كده تلفه بقطن أو شاش و لزق طبي محترم و النزيف لو مـــوقفش أضغط على مكان النزيف نفسه بالشاش أو القطن لحد ما يقف بالضغط مش بالبن . . ده تشربه أحسن
الـفــتّـاي : حـــسام الــديــن ســـالــم
مناخيرك بتنزف ؟!! رجع راسك بسرعة لورا عشان توقف النزيف
هناك شخص ناصح هو اللي طلع الفتية دي معرفش منين جابوا المعلومة و مبنية على إيه بس اللي أعرفه إنها غلط 100% .. أقفشوا الكلمتين دول
أولاً : لو واحد بينزف و رجع راسه لورا مش هيوقف أي حاجة لأنه مقفلش الشرايين اللي بتنزف
ثانياً : الدم اللي بينزفه ده مش هيدخل تاني جوه الشرايين لما يرجع راسه لورا .. اللي هيحصل أنه هيبلعه و دي مشكلة تانية و أحتمال بعدين يرجع الدم اللي شربه تاني
ثالثاً : أزمة كمان إن اللي بيرجع راسه لورا مبنعرفش هو فقد كمية قد ايه .. أوقات بتكون كمية كبيرة لدرجة تدخله في هبوط و احنا مش عارفين خصوصاً في الأطفال
المفروض اللي مناخيره بتنزف يتصرف إزاي
أول حاجة يقعد و يطلع راسه لقدام ( مش لورا خالص ) علشان كل الدم اللي نزفه يخرج بره جسمه ميتبلعش و كمان علشان نبقى عارفين كل الكمية اللي نزفها
تاني حاجة يضغط عليها بصباعين علشان الضغط على الشريان اللي بينزف يساعد على التجلط اللي هيوقف النزيف
تالت حاجة يحط كمادات ساقعة علشان البرودة بتخلي الشرايين تضيق
رابع حاجة لو النزيف موقفش بنجيب قطعة قطن مبلولة "إفيدرين" نحطها في مناخيره و بنخلي العيان يتف أي دم يوصل للحلق علشان ميبلعوش غصب عنه
لو الدم لسه موقفش أو العيان نزف كمية كبيرة نسبياً لازم يروح لدكتور بسرعة بيتعامل على أنه طوارئ
الـفــتّـاي : حـــسام الــديــن سالم
اسأل مجرب ولا تسأل طبيب مثل قديم لا يليق بمن قاله إلا أن يكون وغد من أوغاد أفلام أبيض و أسود :) خرب بيوت المرضى و بالطبع الأطباء الذين أغلق عليهم باب رزقهم بسبب فتاوي هؤلاء :) في هذا الباب نسعى لهدم المعلومات المغلوطة عن الطب
لمبة فلورسنت
"لو المولود أصفر نوّروا جنبه لمبة فلورسنت هايروح الصفار".. الفتية دي شعبيتها في مصر أكتر من شعبية توفيق عكاشة شخصياً و ناس كتير بتعملها و مقتنعين إنها بتعالج الأطفال اللي – الشر برة وبعيد- بيصفرّوا
معلومات هامة
اولاً :60% من الأطفال بيصفرّوا بعد فترة يومين أو 3 و دي ظاهرة طبيعية مش مرض أصلاً .. هاشرحها بشكل سريع ف الآخر ( ملحوظة مهمة .. 60% من الطبيعيين بيصفرّوا لكن مش كل اللي بيصفرّوا طبيعيين )
ثانياً :فيه فعلاً علاج بالضوء ( و ده كان الأساس اللي اتبنى عليه الفتية ) بس ده بجهاز معين فيه لمبة الطول الموجي بتاعها بيبقى 450-460 نانومتر و بنعرضها للطفل على مسافة محددة و شروط محددة عشان يبقى ليها تأثير و نتجنب آثارها السلبية و اللمبة اللي الطول الموجي بتاعها 450-460 نانو دي مالهاش أي علاقة إطلاقاً باللمبة الفلورسنت اللي بنجيبها من عند الكهربائي
ثالثاً :الصفار – لو هو طبيعي مش بسبب مرض- بيروح لوحده بعد حوالي أسبوع من غير أي علاج خالص .. عشان كده فيه ناس مقتنعة بفايدة اللمبة السحرية اللي عالجت الطفل و الحقيقة إنهم لو سابوا الطفل من غير اللمبة كان الصفار راح برضه في نفس الوقت عادي خالص
ليه الطفل بيصفرّ أصلاً ؟
هاختصر الكلام جداً .. الجنين في بطن أمه بيوصله أكسجين قليل من المشيمة فبيصنع كرات دم حمرا زيادة تشيل أكسجين أكتر لخلايا جسمه و كده يعوض نقص الأكسجين اللي عنده.. بعد الولادة و نجاح عملية التنفس بيبقى عنده وفرة في الأكسجين و بالتالي عدم أحتياج للكميات الكبيرة اللي كانت عنده من كرات الدم الحمرا و هو جنين فيبدأ يكسرها .. تكسير الهيموجلوبين اللي حوه كرات الدم الحمرا بينتج عنه كميات كبيرة من البيليروبين في الدم .. دي اللي بتسبب اللون الأصفر ده و بعد أيام قليلة بيكون الجسم تخلص من البيليروبين ده و يرجع الطفل للونه العادي بس لازم نفرق بين الصفار الطبيعي ده اللي أنا شرحته و الصفار اللي بيبقى بسبب مشكلة فعلاً عند الطفل .. المفروض الطبيعي بيظهر بعد يومين أو تلاتة و مهما زاذ البيليروبين مايوصلش أبداً ل15 مج % لو حصل قبل كده أو النسبة زادت تبقى مشكلة لازم تروح لدكتور و لازم تتعالج عشان ليها مخاطر .. و علاجها مش لمبة فلورسنت
كتابة : حــســام الديـــن ســـــالم
