بعد ما اكتشفت ان اسم الباب بتاعي "خمرة و لبن" مكنش ينفع ابدأ اكتب من غير ما اشرح ليه الاسم ده
ببساطه في يوم كنت مشدودة جداً لكلام معز مسعود في برنامج رحلة اليقين حتى اني فضلت متنحة قدام التتر شدني اوي الصور المتتابعة على الموسيقي ..نقطة ماء جمبها نقطة نازلة من محلول ،حمام علي ساعة مكة و نفس الحمام ع البيج بن ،دوران درب التبانه مع دوران الحجاج ..شبه بعض اوي بس عكس بعض اوي ..و جت الصورة الاخيرة ..كاس خمرة و كاس لبن ..اكتشفت ساعتها ان الصورة دي من زمان اوي..من ليلة الاسراء و المعراج لما عرض علي الرسول (صلي الله عليه و سلم) خمرة و لبن فاختار اللبن فقبل له:انها الفطرة ..هي دي الحكاية ..صراع جوانا بين فطرة و غرائز،روحانية و مادية ،حب و خوف ، و كل المتضادات اللي في الدنيا و عليها انها تخلق مننا اشخاص اسوياء
المهم ..قررت اتكلم عن قصتي مع التفكير ،بس كطبيعة بشرية مش فاكراها كاملة ..فاكرة مواقف معينة و برده مش عارفة اشمعنى المواقف دي اللي دماغي اختارتها....فاكره لما كنت طفلة ذو فكر فلسفي و بتخيل اني ضيفة في برنامج تلفزيوني و قولت فكرة خطرت ببالي ..."اصلاً كل شئ حلال ربنا خلقه يمتعنا به و حرم شوية حاجات قليلة علشان فيها ضرر لينا و لغيرنا " و اقنعتني اوي الصراحة و بعد شوية سنين لقيت احد الشيوخ بيقولها :الاصل في كل شئ الاباحة...الله ما احنا بنعرف نفكر اهو ...و برده لما اتفلسفت و قولت :اصلا الدين الحق ان كل الاخلاق و القيم دي تبقي متاصلة فيك انت مش مجرد انك تعملها من ورا قلبك ...لا لازم تدوب في شخصيتك و تبقى انت كده ...و بعدها سمعت عمرو خالد بيقولها ...حبيبي يا دكتور والله و شوية مواقف كده مش مهمة في ذاته علي قد اهميتها انها خلتني اكتسب ثقة في تفكيري و حببتني في الدين جداً
بس في سؤال كان شاغلني اوي ...ليه ربنا انزل انبياء كتير و اديان مختلفة .. و بعد تدقيق و تفحيص و تفكير وصلت لاجابه اقنعتني و هذا نصها : كل زمان له اهله و عداتهم و افكارهم و الشئ اللي ناقصهم علشان يحققوا التوازن في الحياه .. يعني مادية اليهودية كانت لازمة لانهم كانوا مستضعفين في الارض ، وروحانية المسيحية كانت لازمة لاهل هذا الزمن مروراً بقوم لوط و قوم شعيب و و و كلها امثلة تؤكد فكرتي ...الهدف منها تحقيق التوازن و تاكيد وحدانيه الله و تحرير البشرية ...ولان الله العليم اراد لدين الاسلام ان يستمر ليوم القيامة و عالم بحال تلك الامة الاخيرة ...لذا كان لازم الدين ده يناسب كل الاجيال اللي جاية و بالفعل وجدنا تناسب الدين مع كل الازمنة اللي فاتت بل ان صلاح تلك الازمنة كان بقيام الدين و النواحي اللي تركوا الدين فيها فسدت
و في عصرنا ..عصر العلم و التقدم كان لازم نكتشف ان الاسلام سابق لكل ده و بيدعوا ليه..و انتم تغلبوني في تسميع ايات الاعجاز العلمي و الايات اللي بتحث ع التفكير :"لعلكم تتفكرون" ،"لعلكم تعقلون" ، "افلا يتفكرون" ،"افلا يعقلون" ، " افلا يتدبرون" ..صرخة ..كانها بتصرخ ....انتوا ازاي مبتفكروش ؟؟!! اصلا انت لو مفكرتش هتضل ..و ازاي بتقول انك بتفكر و مشوفتش الحق ده كله ؟؟!!...و من ساعتها وانا بفكر
كتابة : نـــورا أحـــمد
